Бұл бауыр мен ас қорыту жүйесі ағзалары ауруларын диагностикалау, алдын алу және емдеудің заманауи тәсілдерін талқылау үшін жетекші сарапшыларды, ғалымдарды және тәжірибелі дәрігерлерді біріктіретін жылдың маңызды кәсіби іс-шараларының бірі.
Конгресті ұйымдастырушы - ҚР Денсаулық сақтау министрлігінің бас штаттан тыс гепатологы, гастроэнтерологы, медицина ғылымдарының докторы, Ұлттық ғылыми онкологиялық орталықтың профессоры Күлпаш Сағындыққызы Қалиасқарова құттықтау сөз сөйлеп, Қазақстандағы бауыр жеткіліксіздігі мәселесінің өзектілігін атап өтті.
Ғылыми бағдарлама аясында қазіргі гепатологияның негізгі бағыттары бойынша баяндамалар ұсынылды. Медицина ғылымдарының кандидаты, Marienhospital Aachen клиникасының гастроэнтерология бөлімінің меңгерушісі Қаһарман Ізбасарұлы Есмембетов «Метаболизммен астасқан бауырдың стеатозды ауруы. Жіктелуі. Заманауи тәсілдер мен мүмкіндіктер» тақырыбында баяндама жасады.
Орталық Азиядағы D гепатитіне қатысты жағдайға да ерекше назар аударылды. Өзбекстан Ғылым академиясының академигі, профессор, Вирусология институтының директоры Еркін Исқақұлы Мұсабаев аталған бағыттағы өзекті мәселелер мен оларды шешудің ықтимал жолдары туралы баяндама ұсынды.
Конгресс бауыр және асқазан-ішек жолдары ауруларына шалдыққан пациенттерге көрсетілетін медициналық көмектің сапасын арттыру үшін халықаралық және пәнаралық диалогтың маңызын тағы бір мәрте айқындады.